Sóley Björg Ingibergsdóttir er aðeins 27 ára gömul en hún greindist nýverið með brjóstakrabbamein. Kraftur, félag ungs fólks sem greinst hefur með krabbamein og aðstandendur, fjallaði í dag um þá ákvörðun Sóleyjar að raka af sér hárið áður en hún missir það vegna lyfjameðferðar.
„Partur af því að greinast með krabbamein er oft á tíðum hármissir sem er aukaverkun af lyfjameðferðinni,“ segir í færslu Krafts en bæði Kraftur og Sóley veittu DV góðfúslegt leyfi til að fjalla um færsluna. Í færslunni segir frá því að Sóley hafi ákveðið að taka málin í sínar eigin hendur og raka af sér hárið og gefa það til hárkollugerðar áður en hún missir það vegnha lyfjameðferðarinnar.
Sóley tjáir sig um ákvörðunina í færslunni en hún segist hafa gert þetta þar sem mest annað er nú þegar komið úr hennar höndum. „Það sem lífið er nokkurn veginn komið úr mínum höndum og læknarnir stjórna öllu þá ákvað ég að ég myndi stjórna því hvenær ég yrði sköllótt. Þá fór ég að hugsa hvernig ég myndi vilja hafa þetta allt saman og komst ég að þeirri niðurstöðu að mig langaði að raka hárið af áður en það myndi byrja að detta og að mig langaði að gefa það til hárkollugerðar,“ segir Sóley.
„Ég ákvað að þetta yrði minn dagur þrátt fyrir tilefnið hafi komið til vegna hluta sem ég stjórna ekki, þannig ég var með allt mitt fólk með mér sem gaf mér ótrúlegan styrk og þetta varð gleðidagur. Þetta er dagur sem ég mun aldrei gleyma og ég er svo þakklát fyrir allt fólkið í kringum mig sem var tilbúið að hafa gaman með mér.“
Hér fyrir neðan má sjá færsluna í heild sinni sem Kraftur birti fyrr í dag:
https://www.facebook.com/kraftur.org/posts/3894328693990566