Sjónvarpskonan og raunveruleikastjarnan Ulrika Jonsson sagði í viðtali við Best Magazine að hún væri mjög spennt fyrir því að Bretland opni aftur og að hætt verði með lokanir innan landsins. Ástæðan er einföld. Hún vill byrja að djamma og sofa hjá aftur.
Þessi 53 ára sænsk-breska fyrrverandi veðurfréttakona segir það vera nánast lífsnauðsynlegt að kyssa ókunnugt fólk sem hún sér á barnum. Hún ætli sér svo sannarlega að njóta frelsisins þegar hún fær að fara aftur út á lífið.
„Mig langar að fara á veitingastað, verða algjörlega blindfull og svo stunda kynlíf með haug af ókunnugum einstaklingum,“ segir hún en bætir við að það gæti verið ekki svo góð hugmynd, en að fólk gæti áttað sig á því hvað hún meinar.
Ulrika hefur gifst þrisvar og gengið í gegnum skilnað jafn oft, nú síðast árið 2019. Hún er þó mætt á Tinder og hefur verið þar síðan stuttu eftir að kórónuveiran fór á stjá. Hún er tilbúin að hitta menn á aldrinum 26-50 ára en elsti sonur hennar er 26 ára og því dregur hún línuna þar.
Hún er mjög opin á Instagram og birtir oft djarfar myndir með áhugaverðum texta, eins og þegar hún fór út í sólbað og skrifaði: „Sólin er úti, litlu brjóstin eru úti“.