Leikkonan Evan Rachel Wood, sem er hvað þekktust fyrir hlutverk sitt í Westworld, hefur áður talað um ofbeldi sem fyrrverandi kærasti hennar beitti hana en hún hafði áður ekki sagt hver það var. Nú hefur hún ákveðið að nafngreina manninn en maðurinn er Brian Warner, betur þekktur sem tónlistarmaðurinn Marilyn Manson.
„Hann byrjaði á að tæla mig (e. grooming) þegar ég var táningur og hann beitti mig hryllilegu ofbeldi árum saman. Ég var heilaþvegin og neydd í að hlýða,“ skrifaði Wood í færslu sem hún birti á Instagram-síðu sinni í dag. Vanity Fair og fleiri fjölmiðlar um allan heim hafa fjallað um málið í kjölfarið.
„Ég er hætt að lifa í ótta við hefndaraðgerðir, rógburð eða kúgun. Ég ætla að koma upp um þennan hættulega mann og vekja athygli á iðnaðinum sem gerir honum þetta kleift, áður en hann eyðileggur fleiri líf. Ég stend með þeim mörgu fórnarlömbum sem munu ekki láta þagga í sér lengur.“
Að minnsta kosti fjórar aðrar konur hafa stigið fram með sínar eigin sögur af Marilyn Manson eftir að Wood birti færsluna. Konurnar saka Manson um kynferðislegt ofbeldi, andlegt ofbeldi og líkamlegt ofbeldi. Manson hefur áður verið sakaður um ofbeldi áður og hefur hann þá þvertekið fyrir það.
Ashley Walters er ein af konunum sem sakaði Manson einnig um ofbeldi. „Ég þjáist ennþá af áfallastreituröskun og glími við þunglyndi,“ sagði Walters um það hvernig henni líður í dag eftir ofbeldi Manson. „Ég get ekki staðið hjá og látið þetta koma fyrir aðra. Brian Warner þarf að taka ábygð á því sem hann gerði.“