María Krista Hreiðarsdóttir er grafískur hönnuður og heldur úti vinsælu heimasíðunni mariakrista.com þar sem hún leggur áherslu á ketó- og lágkolvetnamataræði. Hún tók barnaherbergi Ölmu, dótturdóttur sinnar, í gegn á dögunum.
„Dóttir mín og fjölskylda hennar voru að flytja heim frá Danmörku og Alma hefur aldrei átt eigið herbergi. Það var allt málað hvítt, engir litir og frekar kuldalegt. Ég fékk að skipta mér af og byrjaði að mála einn vegg gráan og svo langaði okkur að gera fjöll, en ekki þessi týpísku fjöll. Ég gerði skapalón og málaði með prufum frá Slippfélaginu,“ segir hún.
Framkvæmdirnar tóku í heildina um tvo daga og var kostnaðurinn einnig í lágmarki. „Það var ekki mikill kostnaður. Prufurnar kosta lítið og filmurnar einnig. Þetta var kannski um tuttugu þúsund krónur í heildina, ekki alveg viss. Þetta er ekkert puntuherbergi, það má alveg leika sér og rústa því að vild. Það er líka auðvelt að taka til í því. Hún er líka dugleg að taka til, vill hafa hreint í kringum sig.“
„Ég gerði himnasængina sjálf. Hún er úr gardínu frá Rúmfatalagernum, sem kostaði um þúsund kall. Ég setti hana á járnhring úr Föndurbúðinni og svo á krók í loftið. Þetta er bara upp á punt, hún er ekki að nota þetta mikið.“
Barnaeldhúsið er úr IKEA og var smá loftbelgjaþema í herberginu. Á einum veggnum er mynd frá Bergrúnu Írisi af loftbelg.
„Dúkkurúmið fengum við hjá Sorpu og máluðum það bleikt.“
„Hillurnar eru úr IKEA, heita Svalnäs. Við vorum með þær í búðinni okkar, Systur og makar. Við ákváðum að hafa þær svona neðarlega svo hún gæti notað þetta sem skrifborð.“
„Hún er frekar mikill bókaormur þannig að við settum hilluna fyrir ofan rúmið. Ég framleiði þessar kanínuhillur, þær fást á kristadesign.is.“
María Krista hannar og selur stafrófsplakatið. Ef þú skoðar það gaumgæfilega sérðu að á eina fígúruna vantar hár, aðra vantar einn útlim, þær eru fjölbreyttar eins og mannflóran.
„Svo bjó ég til límmiða hjá Dekal filmum. Ég teiknaði upp mynstur og bað hana um að skera út límmiða og skreytti svo fjöllin með því.“
