Bubbi deilir símanúmerinu hjá einstaklingnum sem þykist vera hann og spyr hvort einhver þekki það „Veit einhver hver er með þetta númer? Sá sem er með það þykist vera ég, án gríns,“ segir Bubbi í færslu sem hann birti á Facebook-síðu sinni í dag.
„Ef menn eru að hringja og segjast vera ég og herma eftir mér og bulla eitthvað þá eru þeir komnir inn fyrir eitthvert svæði sem þeir eiga ekki að vera á, það er bara þannig,“ segir Bubbi um málið í samtali við DV. „Ég kæri þetta sennilega bara, ég er ekki að samþykkja þetta.“
Bubbi er orðinn langþreyttur á þessu en hann hefur einnig lent í því að fólk þykist vera hann á samfélagsmiðlinum Instagram. Það hefur verið í gangi í mörg ár. „Þeir þykjast vera ég og senda stelpum og konum skilaboð. Það er búið að vera mjög lengi og er ennþá í gangi,“ segir Bubbi en hann er þó kominn með auðkenningu á samfélagsmiðlinum sem sýnir hvaða aðgangur er hinn eini sanni Bubbi. „Ég er búinn að vera heppinn að fólk sem ég þekki sér í gegnum þetta.“
Auðkenningin kemur þó ekki í veg fyrir að aðrir þykist vera Bubbi. „Engu að síður þá er þetta búið að standa yfir mjög lengi,“ segir hann. „Ég held að þetta hafi bara fyllt mælinn. Ég mun hafa samband við lögfræðinginn minn og svo bara kæri ég þetta.“