Eftir fjórtán ár og tuttugu þáttaraðir mun vinsæli raunveruleikaþátturinn Keeping Up With The Kardashian hætta í framleiðslu. Stjörnur þáttarins tilkynntu það í gær á samfélagsmiðlum og þökkuðu aðdáendum sínum samfylgdina. Síðasta þáttaröðin mun fara í loftið í byrjun árs 2021.
https://www.instagram.com/p/CE5AwirA4Cx/
Höfuðpaur fjölskyldunnar, Kris Jenner, afhjúpar ástæðuna fyrir endalokunum í viðtali við Ryan Seacrest.
„Ég á eftir að fara að gráta aftur,“ sagði Kris við Ryan í útvarpsþættinum On Air With Ryan Seacrest.
Hún segir að fjölskyldan sé enn að melta ákvörðun sína. „Ég vaknaði í morgun og fór á æfingu klukkan fimm með Khloé og Kim og við bara sátum þarna og horfðum á hver aðra og sögðum: „Vá, þvílíkt ferðalag,““ segir Kris.
Kris segir að fjölskyldan sé þakklát fyrir allt sem þátturinn hefur fært þeim. En nú sé hreinlega rétti tíminn til að kveðja.
„Ég held að það sé talan 20, eða hún hljómaði vel þar til 2020, en talan 20, þetta er bara rétti tíminn. Ég held að það sé tímabært fyrir okkur að slaka á og taka því rólega. Finna út hver næstu skref okkar eru,“ segir hún.
Fjölskyldan tók þessa ákvörðun saman en einn meðlimur klansins á þó erfiðara með að sætta sig við hana en aðrir.
„Við þurftum að segja tökuliðinu okkar þetta í gær og við vorum allar grátandi. En ég held að Khloé sé sú sem á erfiðast með þetta. Hún hefur eiginlega ekki hætt að gráta síðan við tilkynntum þetta. Hún er svo yndisleg og tilfinningarík,“ segir Kris.
Tuttugusta þáttaröðin fer í loftið í byrjun árs 2021. Þátturinn fór fyrst í loftið í október 2007.