Auglýsing á vegum Fulltrúa Jesú Krists á Íslandi hefur vakið talsverða athygli á samfélagsmiðlum. Í auglýsingunni má sjá mann ganga yfir götu þegar bíll kemur á fleygiferð og keyrir á hann. Maðurinn birtist skyndilega hinum megin við veginn og segir: „Stundum líður okkur eins og við séum lurkum lamdir. Sendu okkur skilaboð til að læra hvernig Kristur getur hjálpað þér.“
Dóri Ká deildi auglýsingunni á Twitter og skrifaði með: „Hmm hvernig náum við til unga fólksins, já þetta ætti að virka.“ Yfir 2700 manns hafa horft á myndbandið og fjöldi líkað við færsluna.
Hmm hvernig náum við til unga fólksins, já þetta ætti að virka. pic.twitter.com/h0JtfcWdex
— Dóri Ká (@halldork) August 31, 2020
DV heyrði í fulltrúa Jesú Krists á Íslandi sem viðurkennir að þeir væru að reyna að ná til yngra fólks með auglýsingunni.
„Við erum að reyna að ná til yngra fólks og hjálpa fólki að finna frið og öryggi í gegnum Jesú Krist,“ segir hann og bætir við að hingað til hafi þeir fengið góð viðbrögð. Þrátt fyrir það ákváðu þeir að fjarlægja auglýsinguna, eftir að hún var uppi í aðeins tólf tíma.
„Jafnvel þótt við höfðum boðskap um Jesú Krist og hvernig hann getur hjálpað okkur í gegnum erfiðleika í auglýsingunni, þá fannst okkur að maður sem er að lenda í slysi sé ekki besta leiðin til að lýsa boðskap okkar. Því hefur auglýsingin verið fjarlægð,“ segir hann.
Aðspurður hvernig gengur að fá ungt fólk til að koma til liðs við þá segir hann: „Stundum er trú eitthvað sem fólk vill ekki ræða um í heiminum í dag. En samt er til fólk sem vill spjalla við okkur um hana. Við erum alltaf að reyna að ná til þessa fólks. Það skiptir engu máli hvað það eru gamalt.“