Eftirfarandi er bakmoli sem birtist í nýjasta helgarblaði DV
Rapparinn Gauti Þeyr Másson, betur þekktur sem Emmsjé Gauti, hefur húmor fyrir flestu en virðist alls ekki vera með græna fingur. Gauti rær nú lífróður heima fyrir á meðan kærastan er erlendis. Gauta var falið að sjá um heimilisplönturnar sem hann virðist vera að aflífa í rólegheitum. Hann leitaði sér aðstoðar í hóp stofublómaáhugamanna á Facebook:
„OKAY talið við mig. Konan fór til útlanda og blómin þjást í takt við það. Ég er búinn að vökva blómin þegar moldin er þurr en samt er þessi stemning á heimilinu. Ef einhver er til í að útskýra fyrir mér eins og ég sé fimm ára hvað ég á að gera væri það vel þegið. Massíf ást á alla!“ Birtir Gauti myndir af deyjandi plöntunum. Meðlimir hópsins virðast flestir halda að um ofvökvun sé að ræða en einn þeirra bendir honum á að úr þessu sé best að hann kaupi bara nýjar plöntur daginn sem konan kemur heim.
Jovana Schally, unnusta Gauta, er líklega mjög áhættusækin fyrst hún treysti Gauta fyrir plöntunum þar sem skýrt kemur fram í einu vinsælasta lagi kappans að hann viti ekkert um gróður, enda sé hann alinn upp á malbiki.