Árið 2017 bjó Valgeir Helgi Bergþórsson tímabundið hjá foreldrum sínum vegna þess að hús sem hann hafði keypt var undirlagt myglusveppi og ráðast þurfti í framkvæmdir þar af þeim sökum. Valgeir er afskaplega þakklátur forsjóninni fyrir þessa röð atvika því honum tókst að bjarga lífi föður síns sem fékk hjartaáfall einn morguninn. Ef Valgeir hefði ekki búið hjá foreldrum sínum um þetta leyti hefði honum ekki tekist að bjarga lífi föður síns.
Þetta kemur fram í þættinum Ástarsögur á RÚV Rás 1.
Móðir Valgeirs vakti hann einn sunnudagsmorguninn og sagði að eitthvað amaði að föður hans sem sat í stól fyrir framan sjónvarpið en sýndi ekkert lífsmark. Valgeir náði í örvæntingu að hnoða lífi í föður sinn á meðan móðir hans hringdi á Neyðarlínuna. Faðirinn lifði af og er það að miklu leyti Valgeiri að þakka:
„Það er súrrealísk hugsun að ef ég hefði ekki keypt mér þetta hús þá hefði ég hugsanlega ekki verið heima. Eins elskuleg og mamma er kann hún ekkert í skyndihjálp svo hún hefði ekkert getað gert.“
Einnig kemur fram í þættinum að hann er með samviskubit yfir því að hafa ekki verið til staðar er bróðir hans lést í svefni. Þrátt fyrir það er ólíklegt að honum hefði tekist að bjarga bróður sínum þó að hann hefði verið nálægt honum.