Mad Max: Fury Road leikkonan og fyrirsætan Danielle Riley Keough er elsta barnabarn rokkkóngsins Elvis Presley en eins og margir vita tók bróðir hennar, Benjamin Storm Keough, sitt eigið líf fyrr í mánuðinum.
Í vikunni lét Riley flúra nafnið hans, Benjamin Storm, rétt fyrir ofan viðbeinið. Hún birti mynd af því á samfélagsmiðlum ásamt eldri mynd af húðflúri sem Benjamin bar á svipuðum stað með nafninu hennar. Undanfarið hefur hún birt myndir af þeim systkinunum saman á góðum stundum en þau ku hafa verið mjög náin og Riley hefur deilt því með fylgjendum sínum að hún sé að ganga í gegnum gríðarlega sára sorg.
Foreldrar Riley og Benjamin eru þau Danny Keough og Lisa Marie Presley. Lisa Marie á einnig 11 ára gamla tvíbura, Finley og Harper, með fjórða eiginmanni sínum, Michael Lockwood.
Hún er að vonum niðurbrotin manneskja eftir sonarmissinn. „Hún er harmi slegin, óhuggandi og algjörlega niðurbrotin en reynir að vera sterk fyrir ellefu ára gömlu tvíburana sína og elstu dótturina Riley. Hún dýrkaði þennan dreng. Hann var augasteinninn hennar,“ var haft eftir talsmanni Lisu Marie.