Rapparinn og tískudívan Cardi B er alveg laus við íhaldssemi og skiptir viðstöðulaust um greiðslur og stíl. Hún hóf vikuna með hvelli þegar hún klæddist Luis Vuitton frá toppi til táar og hafði meira að segja skreytt hárið með fangamerkinu fræga. Þessi óður til hátískunnar samanstendur af Louis Vuitton pilsi, Louis Vuitton Chapeau 40 Monogram tösku, Louis Vuitton hári og Louis Vuitton bol sem fatahönnuðurinn Baba Jagne breytti úr pilsi.

Afrakstrinum deildi hún með 71.500.000 fylgjendum sínum og skrifaði undir: „Ég er á leiðinni …takk @sirbabajagne fyrir að breyta pilsi í  bol!“

Cardi er mjög í mun að halda hárinu heilbrigðu og hefur unnið að því hörðum höndum að safna því síðu frá árinu 2014 og leyfir aðdáendum sínum að fylgjast með þeim leiðum sem hún notar til þess. En hvernig skyldi hún hafa fengið þetta Louis Vuitton fínerí í hárið? Sá möguleiki hefur verið nefndur til sögunnar að um hárkollu sé að ræða en einhverjir eru nokkuð vissir um að hún sé að stæla Kim Kardashian sem var með svipað uppátæki í maí síðastliðnum. Kim birti myndir af sér með slönguskinnsmynstur í hárinu sem hún hafði fengið með stensli og lituðu hárspreii. Hver sem aðferðin er er útkoman allavega skemmtileg.