Listamaðurinn Ragnar Kjartansson bað hjónin Atla Bollason og Ásrúnu Magnúsdóttur um að stunda kynlíf fyrir framan myndavél fyrir myndbandsverkið Scenes from western culture, árið 2015. Myndbandið af Ásrúnu og Atla er eitt nokkurra myndbanda í verkinu sem eiga að sýna hversdagslíf Vesturlandabúa.
Hjónin töluðu um þátt sinn í verkinu í þættinum Ástarsögur á Rás 1. Ásrún og Atli segja að sér hafi verið boðið að fara í mat með Ragnari, eiginkonu hans, Ingibjörgu og sameiginlegri vinkonu á staðnum Snaps. Þau hafi þekkt Ragnar mjög takmarkað, en á staðnum hafi hann lýst verkinu fyrir þeim og spurt þau hvort þau hefðu áhuga á að taka þátt.
„Þau könnuðust við okkur og fannst við passa í þetta og höfðu á því orð að þau vildu ekki auglýsa eftir fólki. Kannski töldu þau að þau myndu ekki fá rétta fólkið, heldur myndu þau fá fólk sem fengu einhverja sérstaka kynferðislega fróun úr því að performera fyrir aðra.“
„Þetta er millistéttarpar að elskast í þessu minimalíska herbergi. Þetta eru samfarir, með upphafi og enda,“ segir Atli um verkið.
Þau hafi ákveðið að hugsa málið, enda kannski ekki boð sem maður fær á hverjum degi. Þegar þau hafi labbað af Snaps hafi þau sagt: „Erum við ekki bara til í þetta?“ Enda hafi þau treyst Ragnari sem listamanni.
„Við vorum eiginlega meira að þykjast hugsa um þetta. Það hefði verið of desperat að segja bara „Já við erum til!“, þannig við þóttumst bara hugsa um þetta.“ Sagði Ásrún.
Fram kemur að senan hafi verið tekin upp í fínni íbúð á Mýrargötunni. Á staðnum hafi verið fámennt kvikmyndatökulið, sem hafi síðan farið úr herberginu þegar að myndavélin var farin að taka upp.
„Við vorum ekki búin að ákveða hvað við ættum að gera. Við vorum búin að fá smá leiðbeiningar, en það varðaði aðallega hvernig sængin ætti að vera og hvernig við mættum hreyfa okkur og eitthvað svoleiðis, en svo reyndum við bara að gleyma stund og stað einhvern veginn . Vera ómeðvituð um hvað við værum að gera og fyrir hvern. Þetta var aldrei leikið eða performerað eða kóríógraffað,“
Þau segja að þetta hafi verið rómantísk upplifun, þau hafi fengið kampavín fyrir tökur og þetta hafi verið eins og að „vera í fríi á fancy hoteli í París“.
Í þættinum minnast þau einnig á nokkrar áhugaverðar staðreyndir er tengjast verkinu, til að mynda hafi Ásrún verið ólétt á meðan að tökur voru í gangi og þá hafi kvikmyndatökumaðurinn farið að gráta á meðan að kynlífið var tekið upp. Móðir Atla á þá að hafa rekist á verkið á listasafni þegar hún heyrði rödd sonar síns.