Guðni Th. Jóhannesson, forseti Íslands, greinir frá því á Facebook síðu embættisins að hann og Elíza hafi valið að ferðast innanlands í sumar. Segir hann þar frá því hann og fjölskyldan hafi komið víða við og birtir meðfylgjandi myndir af sér og Elízu á ferðalaginu.

Guðni og Elíza eiga fjögur börn á aldrinum 7 til 13 ára, og Guðni barn úr fyrra sambandi sem er 26 ára. Það ætti því að vera heljarinnar fyrirtæki að ferðast innanlands með alla fjölskylduna með sér. Gildir þar líklega það sama um forsetann og aðra.

Á síðunni segir:

Nýliðinni viku vörðum við fjölskyldan í sumarfríi innanlands. Við fórum víða norðanlands og austan eins og sjá má af nokkrum myndum að neðan. Við komum meðal annars við á Akureyri og Vopnafirði, baðstaðnum Vök við Egilsstaði, Bustarfelli, þeim indæla torfbæ í Hofsárdal, Seyðisfirði og víðar. Þá fórum við í bjórböðin á Árskógssandi og jarðböðin við Mývatn, heimsóttum Óbyggðasetrið glæsilega og Skriðuklaustur í Fljótsdal og sáum fjölmarga aðra magnaða staði. Fyrir hönd okkar Elizu og barnanna þakka ég kærlega fyrir þá gestrisni og góðvild sem við nutum hvarvetna.

Enn fremur minnist Guðni á úrslit forsetakosninganna í Póllandi, þar sem Andrzej Duda bar nauman sigur úr býtum. Segist Guðni hafa sent honum heillaóskir, eins og hefð er fyrir.

Facebook síðu embættisins má sjá hér að neðan.