Auður Albertsdóttir, almannatengill hjá Aton JL, elskar kaffi. Vinnustaðurinn hennar er í Tryggvagötu og hefur Auður því þrætt miðborgina í leit að besta bollanum. Þessir 5 staðir eru á toppnum að hennar mati en hún pantar sér alltaf tvöfaldan latte.
1 Reykjavík Roasters
Ég geri mér reglulega ferð í Brautarholtið fyrir kaffið þarna því það er svo ótrúlega gott. To go glösin þar eru líka minni en hjá öðrum sem gerir þetta einhvern veginn sérstakara. Ekki spyrja mig hvernig, less is more og allt það.
2 Joe and the juice
Það kemur kannski einhverjum á óvart en kaffið á Joe and the juice er virkilega bragðgott. Ljúfur bolli sem yljar og á einstaklega góðu verði á morgnana. Ekki verra að taka með eitt túrmerikskot í leiðinni.
3 Te og kaffi
Þarna er gott að vera á grimmum morgnum. Kaffið er gott og margt í boði til þess að grípa með sér ef maður er svangur. Starfsfólkið er líka það ljúfasta á höfuðborgarsvæðinu, reynið að benda mér á fúlan starfsmann Te og kaffi, sver það, hann er ekki til.
4 Ida Zimsen
Uppgötvaði þennan stað nýlega og get svo sannarlega mælt með! Gott kaffi og notaleg stemning, stutt frá vinnunni minni og eintóm gleði.
5 Kaffitár
Kaffitárkaffið hefur fylgt mér í gegnum súrt og sætt og stendur alltaf fyrir sínu. Að grípa einn kaffibolla þar til að taka með í íslenskri rigningu og bæta jafnvel við súkkulaðibitaköku gerir alla daga góða.
