Hátíðarhald er víðast hvar með breyttu sniði sökum fjöldatakmarkana. Í ljósi nýrra smita síðustu daga hefur fólk verið hvatt til þess að skemmta sér í minni hópum.
17 júní er gjarnan mikið tilhlökkunarefni hjá yngri kynslóðinni sem sér fyrir sér blöðrur, klístraða sleikjóa og skemmtiatriði á hverju horni. Nú eru vafalaust einhverjir foreldrar að leita af skemmtiefni fyrir börnin með mis góðum árangri. Hér koma nokkrar skotheldar hugmyndir.

Bíltúr
Hvernig væri að viðra liðið og fara í dagsferð til dæmis til Hveragerðis eða á Flúðir? Borða góðan mat, kaupa blóm, kíkja í sund og enda kannski á ís? Smelltu hér til að sjá hvað er spennandi á þessum stöðum.

Bakstur og fánar
Það þarf ekki að gera mikið til að dagurinn verði hátíðlegur. Vegleg súkkulaðikaka með kaffinu með íslenskum fána á toppnum getur reddað ýmsu. Ef það er ekki til fáni á heimilinu má vel teikna hann á lítið blað og smella á tannstöngul.

Sund
Sundferð er alltaf til þess fallinn að bæta og kæta. Hvernig væri að kíkja í laug sem fjölskyldan hefur ekki heimsótt áður ? Til dæmis Vatnaveröld í Reykjanesbæ  eða sundlaugina í Mosó?

Hjólaferð
Það er ágætis veður og því tilvalið að fara í hjólaferð um bæinn og sjá það sem þó er í boði án þess að snerta neinn!

Garðdagur
Allir í pollabuxur og taka til í garðinum. Svo má vel henda sér í snú-snú, krikket, fótbolta, feluleik eða gróðursetningu. Svo er tilvalið að enda daginn á góðri grillmáltíð.