„Ég er að ærast úr tilhlökkun fyrir þessu sumri. Elskaði náttúru og útivist fyrir, en Kófið gerði ekkert nema styrkja þá ást og færa hana á næsta stig,“ segir Guðrún Sóley Gestsdóttir dagskrárgerðakona hjá RÚV en hún veit ekkert betra en að vera á fjöllum og hyggst verja „sirka hverri einustu lausu stund þannig í sumar“ eins og hún orðar það.

„Veislan byrjar nú um helgina þegar ég fer á Sveinstind í Öræfajökli með góðum vinum. Síðan ætla ég að ganga um Torfajökulssvæðið í júlí með enn fleiri vinum undir stjórn fjalladrottningarinnar Önnu Rutar Kristjánsdóttur. Síðan mun ég stökkva í allar þær fjallgöngur sem bjóðast og þrautnýta fjöllin í grennd við Reykjavík eftir vinnu og um helgar. Þess á milli ætla ég síðan að liggja í bleyti í sundlaugum landsins, mun sem sagt eyða þessu sumri vel yfir og undir klórvatnsmáli. Já og borða ís og halda grillveislur!“

Guðrún Sóley er spennt fyrir að heimsækja Sveinstind ig Torfajökulssvæðið en þangað hefur hún aldrei komið áður. „Síðan þekki ég Hengilssvæðið lítið og mun kynnast því betur í hlaupi sem þar verður í byrjun júní. Svo langar mig á Jarlhettur og alls konar annað freistandi, ég er nokkurn veginn spennt fyrir öllum hlutum Íslands sem ég þekki ekki.“

Aðspurð um eftirlætis stað eða staði á Íslandi nefnir Guðrún Sóley hálendi Íslands, sem hún kallar „himnaríki sem allir ættu að kynnast.“

„Að slíta sig úr sambandi, fá náttúruna beint í æð og upplifa stórbrotnustu náttúru í heimi er eitthvað sem hleður hjartað út árið, eiginlega ævina. Ég mana til dæmis fólk til að nefna mér partý sem stenst Kverkfjöllum snúning, það er algjör standandi veisla. Það þarf líka ekki að fara í risagöngu eða langa ferð, það er nóg að mæta bara á staðinn og anda að sér loftinu. Leyfa umhverfinu að setjast í taugakerfið og finna hvernig sálin léttist og allt verður auðveldara.“

Í nýju DV er rætt við fleiri þekkta Íslendinga um plönin fyrir sumarleyfið.