Tónlistarmaðurinn Krummi Björgvinsson hefur verið áberandi innan íslensku tónlistarsenunnar síðastliðna tvo áratugi. Hann er oft kenndur við rokkhljómsveitina Mínus en hefur undanfarin ár samið tónlist undir eigin nafni. Nýjasta lag Krumma er eigin útgáfa af vinsæla dægurlaginu Vetrarsól. Þú getur hlustað á lagið á Spotify.
Við ræddum við Krumma um nýja lagið, hvað hann er að gera í samkomubanninu og hvernig ástandið leggst í hann.
Hvað ertu að borða?
„Alls kyns dýraafurðalausan þægindamat ásamt mikið af ávöxtum,“ segir Krummi.
Hvað ertu að drekka?
„Mestmegnis vatn, eplasafa og bjór við gott tækifæri.“
Hvað ertu að horfa á?
„Ég er að glápa mikið á Westerns eða spagettí Vestrænum.“
Hvað ertu að hlusta á?
„Ég er að hlusta mikið á Dave Van Ronk, Futurebirds, Bob Dylan, Tom Petty & The Heartbreakers og Emmylou Harris.“
Hvernig leggst ástandið í þig?
„Dauðsföllin í kringum Covid-19 leggjast afskaplega illa í mig, eðlilega. En ég viðurkenni að þetta eigi eftir að gera heiminn að betri stað. Fólk er farið að sjá hvað kapítalismi er hættulegur og ég tala nú ekki um neysluvenjur mannskepnunnar. Það er svo mikilvægt að við stöndum saman,“ segir Krummi.
„Þetta ástand hefur auðvitað mikil áhrif á okkar litla veitingastað Veganæs en við vonumst til að geta opnað um leið og samkomubanninu verður aflétt. Ég hef nýtt tímann í að semja tónlist og texta. Ég er í miðjum klíðum við það að hljóðrita mína fyrstu sóló plötu. Það verður nú að segjast, sérstaklega þegar það kemur að tónlistarsköpun þá er þetta góður tími til þess.“
Eins og fyrr segir er Krummi að gefa út nýtt lag, eigin útgáfu af dægurlaginu Vetrarsól.
„Stefnan var að gera nokkrar ábreiður af frægum íslenskum dægurlögum til að spila á tónleikum til að gleðja áhorfendur. Vetrarsól var með þeim fyrstu að fara á blað en ég var svolítið smeykur að tækla þetta mikilfenglega lag. Þegar Jón Gunnar Geirdal hafði samband við mig og spurði hvort ég væri til að gera mína útgáfu af Vetrarsól eigin útgáfu ásamt minni hljómsveit. Ástæðan fyrir því er að Jón Gunnar er að framleiða nýja sjónvarpsþætti sem heita „Jarðarförin mín“ með Ladda í aðalhlutverki. Lagið Vetrarsól í upprunalegri útgáfu er þema lag sjónvarpsseríunnar. Þarna var alheimurinn að segja mér að láta slag standa,“ segir Krummi.
