Ástrós Rut Sigurðardóttir greinir frá því á Instagram að hún hefur fundið ástina að nýju. Fréttablaðið greinir frá. Ástrós missti eiginmann sinn, Bjarka Má Sigvaldsson, á síðasta ári eftir sjö ára baráttu við krabbamein. Bjarki var aðeins 32 ára gamall og áttu þau Ástrós saman eina dóttur, hana Emmu Rut Bjarkardóttur.

„Eftir stærsta hjartasár lífs míns ákvað ég að standa upp, rétta úr mér og biðja Lífið um tvennt: Að fá annað tækifæri í hamingju og að fá að upplifa fjölskyldulífið sem mig hefur alltaf dreymt um. Aldrei hefði ég trúað því að svarið kæmi svona fljótt en þessi draumur af manni er svo sannarlega kominn til að vera. Stóri plúsinn er að það fylgir einn 7 ára prins sem ég dýrka og dái. Ég geng því inn í nýjan áratug mjög bjartsýn og blússandi hamingjusöm. Ég veit að Bjarki stendur með mér enda er hann í hjarta og huga mér alla daga og passar uppá okkur stelpurnar. Hann er feginn og þakklátur að við mæðgur erum ánægðar og í góðum höndum,“ segir Ástrós.

https://www.instagram.com/p/B9fOry_Al0E/

Ástrós og Bjarki áttu stóran stað í hjarta þjóðarinnar eftir að þau stigu fram í viðtali í Ísland í dag og opnuðu sig um baráttuna, lífið og framtíðina.

Nýi kærasti Ástrósar er gamall vinur hennar, Davíð Örn Hjartarson. Í samtali við Fréttablaðið segir Ástrós að Davíð sé með nákvæmlega sömu lífsgildi og hún.

Fókus óskar parinu innilega til hamingju með ástina.