Mikil leynd hvíldi yfir tökum nýjustu kvikmyndar bandaríska leikstjórans Terrence Malick, en tökur fóru að stórum hluta fram hér á landi og á Ítalíu. Eftirvinnsluferli myndarinnar er enn í fullum gangi, þrátt fyrir faraldurinn sem nú geisar, en tökur fóru fram sumarið 2019. Afraksturinn ber heitið The Last Planet og fjallar um viðburðaríka ævi Jesú Krists.
Íslenska leikaranum Birni Thors bregður fyrir í myndinni í ótilgreindri rullu en helstu leikarar eru Sir Ben Kingsley, Joseph Fiennes, Aidan Turner, Douglas Booth og ungverski leikarinn Géza Röhrig, sem fer með burðarhlutverkið. Þar að auki fer Óskarsverðlaunahafinn Mark Rylance með hlutverk kölska, sem sýndur verður í fjórum mismunandi gervum.
The Last Planet er sögð taka djarfan og drungalegan vinkil á þekktar dæmisögur um Krist úr Biblíunni og verður myndin útfærð með ljóðrænum brag, líkt og fyrri verk leikstjórans. Á löngum ferli hefur Malick hlotið gífurlegt lof fyrir verk sín, hvað mest fyrir kvikmyndirnar Badlands, The Thin Red Line og The Tree of Life, sem skartaði meðal annarra leikurunum Brad Pitt og Sean Penn.
Ekki er enn vitað hvort framvinda COVID-19 hafi áhrif á útgáfu kvikmyndarinnar, en að öllu óbreyttu eru sýningar fyrirhugaðar næsta haust.
