Leikaraparið Stefán Benedikt Vilhelmsson og Andrea Ösp Karlsdóttir gengu í hjónaband á dögunum í óhefðbundinni athöfn, í skugga COVID-19. Parið tilheyrir Leikhópnum Lottu og hefur verið í sambandi í þrjú ár en þekkst í um tuttugu ár. Í samtali við DV segir Stefán að athöfnin hafi verið ótrúlega falleg, að vel hafi tekist til þótt nauðsynlegt hefði verið að breyta áætlunum töluvert vegna kórónuveirunnar.

Stefán segir hugmyndina að hjónavígslunni hafa komið upp þegar þau voru í Kína í fyrrahaust, ekki löngu áður en faraldurinn hófst.

„Við fengum hugmyndina fyrst um hvað okkur langaði til að gera. Það var ekkert hefðbundið bónorð, heldur var þetta sameiginleg ákvörðun,“ segir Stefán.

„Við ætluðum að vera komin út til Mexíkó á þessum tíma, í góða afslöppun, með millistopp í Bandaríkjunum. Við vorum líka búin að sérpanta hringa frá gullsmiðju. Þá lenti gullsmiðurinn í bölvuðum vandræðum, því sá sem steypir gullhringana fyrir hann var settur í sóttkví. Síðan var öllum flugferðum aflýst,“ bætir Stefán við, og því gekk það ekki þrautalaust að skipuleggja þennan stærsta dag í lífi margra.

Að sögn Stefáns var COVID-19 faraldurinn visst lán í óláni, enda fór athöfnin vel fram og varð að lítilli og notalegri athöfn, sem varð jafnvel einstakari og nánari fyrir vikið eftir breytt skipulag. Í upphaflega planinu ætluðu þau Stefán og Andrea ekki að ljóstra neinu upp um brúðkaupið fyrr en þau væru komin í þaulskipulagða brúðkaupsferð í Cancún í Mexíkó, en þar sem allt fór úr skorðum út af COVID-19 gengu turtildúfurnar í það heilaga hér heima á Íslandi. Þau opinberuðu hjónabandið á Facebook fyrir nokkrum dögum og tekur Stefán fram að enginn hafi vitað af þessu.

„Það voru engir gestir viðstaddir, bara við og stelpurnar okkar. Við létum ekkert stoppa okkur, heldur náðum við að aðlaga okkur nýjum og breyttum aðstæðum. Mestu máli skipti hvað við vorum að gera, ekki hvernig. Ég mæli sterklega með þessu ef ykkur leiðist,“ segir Stefán hress um hjónavígsluna.

„Að lokinni vel heppnaðri athöfn skelltum við okkur svo með stelpurnar í brúðkaupsferð um allt Ísland á 30 mínútum með FlyOver Icleland en það bauð upp á enn frekari tilfinningasveiflur því við komu þangað þurfti að fresta „fluginu“ vegna tæknibilunar,“ segir Stefán, í skýjunum með ástina, lífið og tilveruna á tímum kórónuveirunnar.