Arnold Schwarzenegger, hasarkóngur og fyrrum fylkisstjóri Kaliforníu, hvetur fólk víða um heim til að gera sér grein fyrir mikilvægi ástandsins vegna kórónaveirunnar með því að halda fjarlægð frá samkomum. Í myndbandi sem hann hlóð upp á Twitter-síðu sína slær hann á létta strengi og kveðst vera í einangrun sökum útivistabanns í Los Angeles fyrir eldri borgara.
Í myndbandinu sést Schwarzenegger með gæludýrum sínum, folaldinu Whiskey og asnanum Lulu, og undirstrikar að fólk í kringum sjötugsaldurinn sé í stærri áhættuhópi þegar kemur að veirunni, en hasarkóngurinn er sjálfur 72 ára. „Þess vegna held ég mig heima og borða þar,“ segir Schwarzenegger og mælir harðlega gegn því að sækja veitingastaði um þessar mundir.
„Hlustið á sérfræðinga, hunsið fávita. Við komumst í gegnum þetta saman.“
Myndbandið má sjá að neðan.
Sjón er sögu ríkari.
Stay at home as much as possible. Listen to the experts, ignore the morons (foreheads). We will get through this together. pic.twitter.com/FRg41QehuB
— Arnold (@Schwarzenegger) March 16, 2020