Í gær óskaði Kristján nokkur Guðmundsson eftir smið innan Facebook-hópsins Vinna með litlum fyrirvara. Það væri nú ekki í frásögur færandi nema fyrir þær sakir að hann óskaði sérstaklega eftir pólskum smið en alls ekki íslenskum. Nánar tiltekið sagði hann: „Mig vantar smið, helst pólskan. ALLS EKKI íslenskan!“
Það kemur líklega fæstum á óvart að upp úr þessu spratt talsverð úlfúð. Íslenskum smiðir fannst þeir upplifa fordóma og jafnvel rasisma. „Vá þvílíkur rasisti,“ skrifar einn Íslendingur meðan annar kallar hann fávita. En nokkuð margir gera það einnig í þræðinum.
Kona nokkur sakar hann um að hata eigin þjóð: „Íslendingahatari, útlendingasleikja hlýtur að vera hlynntur að Katrín Jak flytji inn fullt af fólki og síðan rekið úr landi biddu hana um pólverja.hahaha furðulegt“
Einn maður, Jón nokkur, er þó málefnalegri og skrifar: „Af hverju pólskan smið? Ég hvet þig að ráða smið sem er með sveinspróf.“
Þessu svarar Bartosz nokkur og fær sú athugasemd vel ríflega hundrað læk. „Having a driving licence doesnt make you a good driver,“ segir hann og blikkar kerskinn.
