Tónskáldið Hildur Guðnadóttir er orðinn BAFTA-sigurvegari. Verðlaunin voru afhent í gærkvöldi og vann hún fyrir tónlist sína í kvikmyndinni Joker, en fyrr á árinu hafði hún fengið Golden Globe-verðlaunin og fara Óskarsverðlaunin fram næstkomandi sunnudag.
BAFTA (eða Breska Kvikmynda og Sjónvarpsþátta-akademían) er góðgerðarstofnun í Bretlandi sem heldur árlega verðlaunahátíð sem veitir verðlaun fyrir árangur í kvikmyndum, sjónvarpi, teiknimyndum og tölvuleikjum.
Fjölmargir hafa óskað Hildi til hamingju með verðlaunin á samfélagsmiðlum, Íslendingar sem fleiri. Hildur hefur átt sérlega öflugt skeið síðustu misseri en hún hlaut einnig bæði Grammy-verðlaunin og Emmy-verðlaunin fyrir tónlist sína í sjónvarpsþáttunum Chernobyl, sem áhorfendur og gagnrýnendur héldu ekki vatni yfir. Breski kvikmyndagagnrýnandinn Mark Kermode, einn sá virtasti í bransanum, sagði tónlist Hildar úr Joker vera það allra besta sem tilheyrði kvikmynd á árinu liðnu þegar það var gert upp.
„Ég held að flestir sem veðja á Óskarinn eru sammála því að Hildur Guðnadóttir sé stærsta uppáhaldið á komandi verðlaunahátíð fyrir tónlistina í Joker, sem er alveg stórkostleg. Þetta er mín allra uppáhalds kvikmyndatónlist frá síðasta ári,“ segir Kermode í samtali við Scala Radio. „Mér finnst þessi tónlist eiga skilið að vinna verðlaunin og ég tel afar líklegt að hún muni gera það.“