Ástþór Magnússon hefur sett rúmlega 440 fermetra eign sína við Vogasel í Breiðholti á sölu og er ásett verð 142 milljónir króna. Það er Alþjóðastofnunin Friður 2000, sem Ástþór stofnaði sjálfur í lok seinustu aldar, sem er skráð eigandi hússins, sem skiptist í tvær íbúðir, önnur um 170 fermetrar en hin um 270 fermetrar.

Tíu herbergi eru í húsinu sem var byggt árið 1978, á gullaldartímabili uppbyggingar í þessum hluta Reykjavíkur.

Ljóst er að húsið er með mikla sögu og hefur til að mynda hýst Reykjavík Peace Center og Lýðræðishreyfinguna. Í dag er rekið gistihús í eigninni í hjarta Breiðholts.

Ástþór breiddi út hugmyndafræði Friðar 2000 í fyrsta forsetaframboðinu árið 1996 og í bókinni Virkjum Bessastaði sem dreift var á öll heimili. Ástþór bauð sig fjórum sinnum aftur fram til forseta; 2000, 2004, 2012 og 2016. Hélt hann þeirri hugsjón sinni ávallt á lofti að Ísland yrði heimsmiðstöð lýðræðisþróunar og friðarmála. Sá hann einnig fyrir sér að á Íslandi yrði stjórnstöð alþjóðlegrar friðargæslu.

Ástþór sjálfur hefur ekki búið í húsinu um nokkurt skeið. Hann er skráður til heimilis í Bretlandi og hefur látið lítið fyrir sér fara síðustu misseri.