Margir landsmenn kannast við Viktor Andersen. Hann hefur verið mjög opinskár varðandi þær fegrunaraðgerðir sem hann hefur gengist undir. Hann ræddi um fegrunaraðgerðir ásamt Öldu Coco í Föstudagsþættinum Fókus í mars í fyrra.
Viktor fær reglulega ljót skilaboð um útlit sitt. Hann opnaði sig um það í viðtali við DV í september í fyrra. Þar sagði hann skilaboðin mest koma frá öðrum samkynhneigðum karlmönnum á stefnumótaforritinu Grindr. Hann sagðist ekki ætla að láta neikvæðu skilaboðin hafa áhrif á sig.
„Ég ætla bara að halda áfram að vera samkvæmur sjálfum mér og ber höfuðið hátt á þeirri leið sem mig langar að fara og geri það sem ég vil. Skítt með alla aðra,“ sagði Viktor.
„Ég veit bara ekki af hverju sumir gefa sér þetta skotleyfi og eru að koma með einhver óþarfa komment. Maður gerir þetta fyrir sig. Mér finnst ótrúlega fyndið að fólki finnist það vera knúið til að segja eitthvað. Það er ekki eins og þetta sé að hafa bein áhrif á þau eða einhverja aðra.“
Viktor heldur áfram að fylgja þessari heimspeki. Maður skrifaði ljót ummæli við mynd af honum á Instagram og Viktor svaraði honum á skemmtilegan máta. Hann vakti síðan athygli á málinu í Instagram Story og hefur greinilega sjálfur gaman af málinu.
„Djöfulsins ógeð ertu maður/kona/Thing. Maður fær æluna upp í háls við það að sjá þessa viðurstyggð,“ skrifaði maðurinn.
Viktor svaraði þá: „I know right? Ég verð líka veikur við að horfa á þessa fegurð.“
„Ég hef þurft að þola ýmisleg komment í gegnum tíðina og það þarf meira en þetta til að koma mér úr jafnvægi,“ sagði Viktor um ljótu skilaboðin.
„Maður þarf bara að svara fyrir sig fullum hálsi og þá oftast þaggar maður niður í öðrum. Það þýðir ekkert annað. Maður verður að berjast.“