Athafnakonan Manuela Ósk Harðardóttir og samkvæmisdansarinn Jón Eyþór Gottskálksson vöktu verðskuldaða athygli í þáttunum Allir geta dansað. Þótt þau hafi ekki borið sigur úr býtum náðu þau að vinna hjarta hvort annars og eru nú par.
Til að hvíla lúin bein eftir mikla törn í dansþættinum ákváðu þau Manuela og Jón að fara saman í rómantíska paraferð til Kraká í Póllandi. Ferðin byrjaði reyndar á því að flugi þeirra var frestað en fall er fararheill og loks komust turtildúfurnar á leiðarenda.
Það var Manuela sem fékk að ráða áfangastaðnum því hún vildi heimsækja útrýmingarbúðirnar í Auschwitz þar sem rúmlega milljón gyðinga mætti örlögum sínum á grimmilegan hátt í seinni heimsstyrjöldinni. Búðirnar eru staðsettar um sextíu kílómetra vestur af Kraká og eru vinsæll ferðamannastaður þótt fortíðin sé dimm.
Það má með sanni segja að heimsókn í búðirnar hafi haft djúpstæð áhrif á Manuelu og kvað hún svo að orði á Instagram við mynd af gasklefa: „Ein mesta hryllingstilfinning sem ég hef upplifað að standa inní þessum gasklefa.“