Annað undanúrslitakvöld Söngvakeppninnar fer fram laugardagskvöldið 15. febrúar. Fimm flytjendur etja kappi og freista þess að komast í hóp með hljómsveitinni Dimmu og dúett Ísoldar og Helgu, sem komust áfram í úrslitin eftir fyrra undanúrslitakvöldið. Sjálft úrslitakvöldið fer fram 29. febrúar og þá ræðst hver verður fulltrúi Íslands í Eurovision í Rotterdam í maí. DV kynnti sér keppendur betur, en þeir leyna á sér á ýmsum sviðum.
Fæddist blind
Íva fæddist blind vegna augngalla. Hún byrjaði í tónlistarnámi tveggja ára, en faðir hennar er hollenskur og móðirin íslensk.
Stór plön
Íva sigraði í alþjóðlegri ritgerðarsamkeppni Lions-hreyfingarinnar fyrir blind og sjónskert ungmenni árið 2011 og stóð ekki á svörum þegar hún var spurð um sín framtíðarplön. „Ég ætla að verða forsætisráðherra,“ sagði hún þá í viðtali við Morgunblaðið.
Sund og söngur
Auk þess að vera afrekskona á sviði tónlistar æfði Íva lengi vel sund og státar af ýmsum metum í þeirri grein.
Stolt
Nína er vel merkt föðurnafninu en fyrsta húðflúrið sem hún fékk sér var Helgadóttir, en blekið hefur verið á söngkonunni síðan sumarið 2017.
Jólastjarna
Nína hefur lengi reynt að skapa sér nafn í tónlistinni og tók meðal annars þátt í Jólastjörnunni árið 2015 þar sem hún freistaði þess að fá að syngja með sjálfum Bó Halldórs á jólatónleikum. Nína stóð sig með prýði en hreppti ekki hnossið.
Ilmur af velgengni
Það leynist líka frumkvöðull í Nínu en hún stofnaði fyrirtæki ásamt samnemendum í frumkvöðlafræði í Fjölbrautaskóla Garðarbæjar í fyrra. Fyrirtækið sérhæfði sig í framleiðslu á ilmkertum sem róa hugann og Nína gegndi starfi fjármálastjóra í sprotafyrirtækinu.
Afreksmaður í íþróttum
Matti er bæði lærður kafari og keppti í spjótkasti á yngri árum. Hann reyndar spreytti sig í flestum íþróttum sem barn, svo sem fótbolta, handbolta og sundi og státar af verðlaunapeningum í ýmsum greinum.
Tilgangslaus hæfileiki
Matti kann að tala og syngja afturábak, algjörlega áreynslulaust. Þennan hæfileika hafa Íslendingar oft fengið að hlýða á og sjá.
Spólandi góður
Hann byrjaði að vinna í fiski tíu ára gamall og keypti sér hjól fyrir launin. Hann hjólaði mikið sem barn og var þekktur fyrir að geta farið langar vegalengdir á afturhjólinu einu saman.
Hæðin
Daði er 208 sentímetrar á hæð og byrjaði í körfubolta er hann gekk í Fjölbrautaskóla Suðurlands. Hann ku hafa verið ansi öflugur í boltanum þar til hann tók listina fram yfir dripplið.
Fyrsti kossinn
Daði eignaðist nýverið sitt fyrsta barn með sinni heittelskuðu, Árnýju Fjólu Ásmundsdóttur. Þau kynntust í Fjölbrautaskóla Suðurlands en fyrsti kossinn kom á Hróarskelduhátíðinni árið 2010.
Rafheili ársins
Daði var meðlimur í hljómsveitinni ReTroBot sem bar sigur úr býtum í Músíktilraunum árið 2012. Á sömu hátíð var Daði valinn rafheili ársins. Þetta var ekki í fyrsta sinn sem Daði keppti í Músíktilraunum en árið 2008 tók hann þátt með hljómsveitinni Sendibíll.
Ung og efnileg
Hildur sigraði í Söngvakeppni félagsmiðstöðvanna árið 1997 ásamt vinkonu sinni, Ingunni Önnu Ragnarsdóttur, með útgáfu af laginu Sound of Silence. Þær unnu hópakeppnina en í einstaklingskeppni var það Guðrún Árný sem fór með sigur af hólmi.
Spékoppurinn frægi
Einkennismerki söngkonunnar er lítill spékoppur á vinstri vanga sem hún fékk eftir hjólreiðaslys þegar hún var tíu ára. Hildur fór niður brekku á bremsulausu hjóli, datt af hjólinu og lenti harkalega með kinnina á steini. Sauma þurfti nokkur spor í kinnina og þannig fæddist spékoppurinn.
Hasselhoff í uppáhaldi
Hildur var dugleg að láta að sér kveða í Barna-DV og Æskunni á árum áður, skrifaði sögur og auglýsti eftir pennavinum. Þá safnaði hún öllu með Strandvarðagoðinu David Hasselhoff og bauð ýmislegt í skiptum fyrir góss með því tengt, til að mynda veggmyndir með Pláhnetunni, Kiss og Todmobile.
