Bandarísk verðandi móðir á von á þríburum. Hún var ólétt af tvíburum, en tíu til ellefu dögum eftir að þeir voru getnir, varð hún „aftur“ ólétt.

Konan og unnusti hennar voru himinlifandi þegar þau fréttu að þau ættu von á tvíburum, en hún segir að það hafi sannarlega komið þeim á óvart þegar það kom í ljós að þriðja barnið væri einnig á leiðinni.

Konan deildi sögu sinni á TikTok og hefur hún hlotið mikla athygli. Þá hefur News.com fjallað um málið.

Konan útskýrir að tilfelli sem þessi kallist ofurhæfing (e. superfetation), en á egglosun sér stað tvisvar í sama mánuði í stað fyrir einu sinni.

„Vanalega þegar manneskja verður ólétt þá eiga sér stað hormónabreytingar sem sjá til þess að annað egglos eigi sér ekki stað. Það gerðist ekki í mínu tilfelli […] Um það bil tíu prósent kvenna fá egglos tvisvar í mánuði, en einungis þrjú prósent geta orðið óléttar tvisvar á þessu tímabili.“

Hún segir að börnin muni að öllum líkindum fæðast á sama degi, en það hefur komið fyrir að stundum séu mánuðir á milli barna sem eru getin með þessum hætti.

„Tæknilega séð er fæðingardagur barnanna settur á mismunandi daga, en sem betur fer eru þau svo nálægt hvert öðru að þau munu fæðast á sama tíma og því vera talin þríburar. Okkar eru með viku millibili, en stundum geta verið mánuðir á milli og þá fæðast börnin á allt öðrum tíma.“

Verðandi móðirin deilir því að læknar séu duglegir að fylgjast með henni og meðgöngunni, hvort allt gangi ekki vel. Að hennar sögn gengur eins og í sögu, fóstrin virðast alltaf sigrast á öllum helstu prófraunum.

Búist er við því að börnin fæðist í apríl eða maí. Konan segir að markmiðið sé að öll börnin fari fram yfir 28 vikur, og helst að þau verði í 32 til 35 vikur. Hún segir að hún og unnustinn hafi unnið í „lottóinu“, en þau segjast ekki stefna á að eignast fleir börn eftir þetta.

Þá segir hún það mikinn kost að það fari ekki á milli mála hver sé faðir barnanna, en til séu dæmi um stöður sem þessar þar sem að faðerni sé óljóst.