Gestir Einkalífsins á Vísi rifja upp eftirminnilegustu jólaminninguna í sérstökum jólaþætti sem var að koma út í dag.
Þau sem koma fram í þættinum eru Þuríður Blær Jóhannsdóttir, Ragnheiður Ragnarsdóttir, Sigmar Vilhjálmsson, Helgi Jean Claessen, Þorkell Máni Pétursson, Jón Gunnar Geirdal, Sigrún Ósk Kristjánsdóttir og Ástrós Rut Sigurðardóttir.
Í þættinum segir Ástrós Rut fallega sögu af því þegar hún komst að því að hún væri ólétt af Emmu Rut, barni hennar og eiginmanns hennar, Bjarka Má Sigvaldason, sem lést í júní í fyrra eftir langa baráttu við krabbamein.
Það var desember og Ástrós var nýbúin að fá að vita að hún væri ólétt af Emmu.
„Ég þurfti að bíða í nokkra daga. Bjarki var upp á spítala, hann ætlaði að koma til okkar á aðfangadag um kvöldið og ég var búin að taka próf og fékk jákvætt, nokkrum dögum fyrir aðfangadag. Það var sem sagt sama morgun og hann var að fara í heilaskurðaaðgerð. Ég ákvað að taka próf af því bara, ef ég fengi neikvætt myndi ég taka aftur seinna, en ef ég fengi jákvætt gæti ég sagt honum það áður en hann færi í aðgerðina,“ segir hún og bætir við að þau hafi farið í glasafrjóvgun. „Ég fékk jákvætt, blússandi jákvætt um leið,“ segir hún og brosir.
„Ég fer niður á spítala til hans og er eitthvað glottandi. Hann spyr mig hvort ég hafi tekið próf og […] segi honum að það sé jákvætt. Hann var svo ánægður, hann var svo peppaður í þessa aðgerð, hann var svo til í þetta. Hann fór í svo margar heilaskurðaaðgerðir, honum gekk aldrei jafn vel í neinni aðgerð eins og þessari,“ segir Ástrós.
„Hann kom sigri hrósandi út úr þessari aðgerð, svo til í þetta líf. Svo sögðum við systrum hans frá þessu á aðfangadag og það var grátið og hlegið, þetta var yndislegt. Þetta var svo falleg minning inn í jólin,“ segir Ástrós og brosir út að eyrum.
Horfðu á fleiri gesti rifja upp skemmtilegar og eftirminnilegar jólaminningar hér að neðan.