Kona á fertugsaldri leitar ráða til Dear Deidre, kynlífs- og sambandsráðgjafa The Sun. Hún er með nagandi samviskubit fyrir að hafa haldið framhjá eiginmanninum með yfirmanni sínum.
„Ég setti hjónaband mitt í hættu með því að sofa hjá yfirmanni mínum svo hann myndi veita mér stöðuhækkun. Ég fékk starfið en er með svo mikið samviskubit,“ segir hún.
„Ég er 33 ára og vinn sem umsjónarmaður í verksmiðju. Ég hef unnið hjá fyrirtækinu í þrjú ár. Eiginmaður minn hóf eigin rekstur í fyrra en þar sem fyrirtækið er svo nýtt þá fékk hann enga styrki frá ríkinu sökum ástandsins og við höfum verið að glíma við fjárhagslega erfiðleika.“
Næsti yfirmaður hennar var að fara á eftirlaun, kona sem hafði unnið hjá fyrirtækinu í þrjátíu ár.
„Mig langaði í starf hennar, það er betur borgað en mitt,“ segir hún og bætir við að starfið hefði einnig boðið upp á betri vinnutíma svo hún gæti varið meiri tíma með dætrum sínum.
„Framkvæmdarstjóranum hefur alltaf líkað vel við mig og ég ákvað að nýta mér það. Ég ákvað að tæla hann og fá hann til að gefa mér stöðuna.“
Framkvæmdarstjórinn er 59 ára giftur fjölskyldumaður.
„Ég fór til hans á skrifstofuna seint eitt kvöldið, þegar allir voru farnir heim og spurði hann hvort við gætum talað saman. Ég þóttist fella nokkur tár, sagði honum að ég hefði áhyggjur af peningamálum og, alveg eins og ég planaði, kom hann til mín og knúsaði mig,“ segir konan.
„Ég kyssti hann og hann svaraði til baka með ástríðufullum kossi. Eftir nokkrar mínútur lá ég á bakinu á skrifborðinu hans og við vorum að stunda kynlíf. Þegar við vorum búin og ég var að klæða mig í fötin, minntist ég á starfið og hann sagði að ég þyrfti aðeins að spyrja og starfið væri mitt. Ég var himinlifandi en svo heyrði ég að nokkrar aðrar konur í vinnunni ætluðu að sækja um starfið. Þær eru eldri en ég og eiga starfið skilið, svo miklu meira en ég. Ég hef líka haldið framhjá eiginmanni mínum. Ætti ég að segja honum?“
Deidre ráðleggur konunni að segja ekki eiginmanninum. „Þú verður þá kannski ekki með jafn mikið samviskubit en honum á eftir að líða alveg hrikalega illa og það mun ekkert jákvætt koma úr því. Það sem skiptir máli er að sætta þig við að þú hefur gert stór mistök og lofa þér sjálfri að gera þau aldrei aftur,“ segir hún.
„Varðandi starfið, talaðu við framkvæmdarstjórann og vertu hreinskilin, segðu honum að þú sért að velta því fyrir þér hvort sumar samstarfskonur þínar séu reynslumeiri og henti betur í starfið. Vonandi mun hann segja við þig að þú sért að gera lítið úr þér sjálfri og þú sért rétta manneskjan fyrir starfið.“
Að lokum segir Deidre konunni að halda sambandi sínu og framkvæmdarstjórans fagmannlegu héðan í frá.