Athafnakonan og áhrifavaldurinn Lína Birgitta Sigurðardóttir deilir áhrifamikilli mynd á Instagram. Á myndinni sýnir hún muninn á því sem „þú sérð“ og því sem „þú sérð ekki“.
Með þessu er Lína Birgitta að hvetja til jákvæðrar líkamsímyndar og vekja athygli á því að það sem við sjáum á samfélagsmiðlum er ekki endilega raunveruleikinn.
„Það er svo mikilvægt að minna sig á að það sem maður sér á samfélagsmiðlum er yfirleitt einhliða,“ segir Lína.
„Hver og einn stjórnar því sem hann deilir og oftar en ekki deila flestir myndum af sér upp á sitt besta. Sem dæmi er líkaminn minn ekki einhliða heldur er hann ALLSKONAR! Í dag vil ég deila með ykkur fleiri hliðum af líkamanum mínum, en þegar ég sit þá rúllast krúttlega uppá mallann minn, og bara svo það sé á hreinu þá eru magarúllur 100% eðlilegar! Þegar maður situr þá rúllast sjálfkrafa uppá magann og það sérstaklega þegar maður er í þröngum buxum.“
Lína Birgitta hvetur fólk til að iðka þakklæti þegar það á erfiðan dag.
„Ef þú átt „shitty“ dag þegar það kemur að líkamanum þínum, reyndu þitt besta að þakka fyrir það sem líkaminn þinn gerir fyrir þig í stað þess að vera með þráhyggju varðandi hvernig hann lítur út. Líkaminn okkar er nefnilega magnaður. Hann kemur okkur á milli staða, hann meltir matinn sem við borðum, hann gerir okkur kleift að knúsa þá sem við elskum og endalaust meira,“ segir hún.
Færsla Línu Birgittu hefur vægast sagt slegið í gegn. Það er rétt rúmlega klukkutími síðan hún birti færsluna og hafa þegar 1600 manns líkað við hana þegar greinin er skrifuð.
