Ástralska fegurðardrottningin Maria Thattil opnar sig um erfiðleika og fordóma sem hún hefur fundið fyrir vegna fegurðar sinnar.
Maria er áhrifavaldur og tískubloggari frá Melbourne í Ástralíu. Í síðasta mánuði var hún valin Miss Universe Australia. Hún er einnig með BSc-gráðu í sálfræði og MSc-gráðu í mannauðsstjórnun.
Í samtali við News.au opnar Maria sig um erfiða reynslu og fordóma sem hún hefur fundið fyrir vegna fegurðar sinnar, bæði í skóla og vinnu.
Hún rifjar upp þegar hún var að ljúka við námið og byrja að vinna, þá fékk hún oft að heyra að hún þyrfti að vera „sérstaklega vingjarnleg við fólk því þú ert falleg, annars gerir fólk ráð fyrir því að þú sért snobbuð.“
„Ég heyrði þetta frá kvenkyns yfirmanni og það var mjög niðurdrepandi,“ segir hún.
Hún hefur einnig fengið að heyra leiðinleg ummæli frá karlkyns yfirmanni, eins og að hún væri of mikið máluð eða að hún hugsaði mikið út í fataval sitt.
Maria rifjar upp leiðinlegt atvik þegar hún fékk að heyra að hún hafi örugglega fengið vinnu vegna þess að karlkyns yfirmanni hennar líkaði við útlit hennar. Þó svo að viðtalið hafi farið í gegnum síma og það hefðu verið tvær konur sem tóku viðtalið.
Maria segir að það sé í eðli okkar að „dæma fólk“ vegna útlits, en hún vill að fólk viti að: „Hver þú ert ræðst ekki af því hvað aðrir halda um þig.“
Maria er af indverskum uppruna og segir að þó svo að útlit hennar „passi inn í“ núverandi fegurðarstaðla, þá hafi hún upplifað fordóma vegna þjóðernis síns.
„Ég tel það mjög mikilvægt að viðurkenna að fegurðarstaðlar samfélagsins eru sífellt að breytast. Margt náttúrulegt við útlit mitt telst fallegt núna, eins og húðlitur minn og stóru varirnar mínar, því fjölmiðlar og samfélagið hafa ákveðið að það sé fallegt og lofsyngja það,“ segir hún.
„Mér finnst það mjög mikilvægt að tala um þessa hluti, því eins og er nýt ég ákveðinna forréttinda. Og vegna þeirra forréttinda ber ég ábyrgð á því að tala um hluti sem skipta máli. En ég hef líka fundið fyrir fordómum og verið út undan vegna þess að ég hef ekki verið talin nógu farsæl, falleg eða einhvers virði.“
Maria ræðir einnig um þessi mál á Instagram.
