Breskur fimm barna faðir hefur fengið vinnu á leikskóla í Hafnarfirði eftir að hafa sótt árangurslaust um á leikskólum í Reykjavík. Andy Morgan og unnusta hans Heiða Ingimarsdóttir fluttu til Íslands í sumar og leitaði Andy að vinnu, árangurslaust. Heiða tjáði sig um atvinnuleit Andy á Facebook í síðasta mánuði og ræddi einnig við mbl.is um málið á sínum tíma.
Andy talar íslensku og hefur áður búið hér á landi. Eftir að fjölskyldan flutti aftur til landsins vildi Andy vinna á leikskóla og sá að margir leikskólar í Reykjavík væru að auglýsa eftir starfskrafti. En sama hversu oft hann sótti um fékk hann engin viðbrögð. Hann fékk í eitt skiptið þau svör að skólinn væri fullmannaður, en samt sem áður var staðan áfram auglýst. Heiða sagðist velta því fyrir sér hvort að ástæðan væri aldur og kyn Andy.
Hafnfirðingur.is greindi frá því í gær að Andy væri kominn með vinnu á leikskólanum Hjalla í Hafnarfirði.
Í samtali við hafnfirdingur.is segir Heiða að leikskólastjórinn hafi haft samband við Andy eftir að hafa séð viðtalið og boðið honum í viðtal. „Hann gekk út úr því með atvinnutilboð sem hann að sjálfsögðu þáði á staðnum,“ segir hún.
Að sögn Heiðu lýst Andy vel á nýja starfið og sé létt að vera kominn með vinnu.