Fjölmiðlakonan Sigrún Ósk Kristjánsdóttir er nýjasti gestur Einkalífsins á Vísi. Hún hefur unnið við fjölmiðla síðastliðin 22 ár og rifjar upp í viðtalinu að hún kom fyrst fram í sjónvarpi þann 11. september 2001. Sigrún hefur um árabil slegið í gegn með þættina „Leitin að upprunanum“ á Stöð 2. Hún ræðir um þættina og segir frá andlegum áhrifum þess að vinna við þættina.

„Ég hef oft sagt að það sé erfiðara fyrir viðmælendur en mig en ég get játað að þetta rífur oft í,“ segir Sigrún í viðtalinu.

„Þetta er mjög stressandi og mikið langhlaup og mikil fjarvera frá heimili. Þetta er einhver tilfinningasúpa, þó maður standi bara á hliðarlínunni. Að vera vitni að þessum endurfundum,“ segir hún.

„Mér hefur fundist erfiðast að horfa á þessar mæður sem hafa þurft að gefa börnin sín frá sér vegna fátæktar. Auðvitað eru börn gefin af alls konar ástæðum en mér finnst það sárasta tilhugsunin því maður setur sig í þessi spor, svona óhjákvæmilega, og líka ég held að það sé allt annað að gefa barn og vita hvað var af því, vita að það hefur það gott, en að vera bara í myrkrinu hvað það varðar held ég að sé bara ógeðslegt. Svo einhvern veginn mætum við þarna út og það eru þessir endurfundir og allt það, og svo eru börnin farin aftur,“ segir hún og bætir við að það séu oft takmarkaðir möguleikar að hafa samband.

Sigrún rifjar upp augnablik í Sri Lanka þar sem hún þurfti að halda við móður sem grét svo mikið að hún gat ekki staðið í fæturna. „Þetta rífur í, það gerir það,“ segir Sigrún og viðurkennir að hafa sjálf fellt tár við tökur þáttanna.

Þú getur horft á þáttinn í heild sinni hér að neðan.