Sigurður fær reglulega beiðnir frá hlustendum sínum um að spila óskalög. Nú þegar hrekkjavakan nálgast eru hlustendur byrjaðir að biðja hann um að spila „Thriller“ með Michael Jackson, einum vinsælasta, og umdeildasta, tónlistarmanni sögunnar.
„Ég hef alltaf sagt „nei því miður, ég spila ekki lög með honum á minni vakt“, og þá hef ég fengið að heyra það óþvegið frá hans dyggustu aðdáendum og því langar mig að klára þetta mál í eitt skipti fyrir öll,“ segir Sigurður og gefur út yfirlýsingu þess efnis og útskýrir hvers vegna hann spilar ekki lög eftir Michael Jackson.
„Ég Siggi Hlö, útvarpsmaður, spila ekki lög með Michael Jackson í þætti mínum á Bylgjunni. Hann er að mínu mati barnaníðingur af verstu tegund og ég hef engan áhuga á að upphefja hann með því að spila lögin hans. Ég er ekki sammála þeim sem segja: „Það var aldrei neitt sannað á hann“ eða „hann er svo stórt nafn í tónlistarheiminum“ eða „hann á svo rosalega mörg þekkt lög“. Fyrir mér er engin afsökun á hans hegðun gangnvart ungum drengjum og þess vegna hef ég tekið þessa afstöðu, sem tveggja barna faðir, og bið hlustendur um að virða það við mig.“
Yfirlýsing Sigurðar hefur vakið athygli og hafa yfir 500 manns líkað við færsluna og rúmlega 80 manns skrifað við hana. Viðbrögðin hafa verið mestmegnis jákvæð í garð Sigurðar