Tæknisérfræðingurinn Honza Simsa er 26 ára og gagnkynhneigður. Hann fer í vinnu á virkum dögum en í frítíma sínum nýtur hann þess að klæða sig í kvenmannsföt. Hann klæðist háhæluðum skóm, setur á sig litríkar hárkollur og notar gerviaugnhár.
Honza er mjög hrifinn af svokölluðu „plastdúkku-útliti“ og er sjálfur með um 90 ml af fylliefni í andlitinu. Hann fyllir í varirnar, kinnarnar og hökuna í hverjum mánuði.
„Ég klæði mig kannski svona og lít svona út, en ég er samt karlmaður,“ segir hann við Fabulous Digital.
„Ég laðast að konum, en sumum þeirra finnst útlit mitt vera vandamál og ruglandi. Ég er einhleypur og það er í lagi mín vegna.“
Honza segist vera hrifinn af konum sem líta út eins og hann. „Ég laðast að svona gervilegu Barbie-útliti. Ég var samt alveg ánægður með sjálfan mig þegar ég var karlmannlegri en ég er mun hamingjusamari núna og er hvergi nær hættur,“ segir hann og bætir við að hann hafi tekið ákvörðunina um að líta út eins og plastdúkka eftir miklar vangaveltur.
Ekki nóg með að Honza sé með fylliefni í vörunum þá hefur hann einnig látið lyfta efri vör sinni um níu millimetra.
Honza hefur átt erfitt með að finna vinnu vegna útlits síns en vinnur í dag sem tæknisérfræðingur. „Ég lít út eins og karlmaður þegar ég fer í vinnuna, klæðist karlmannsfötum og nota engan farða,“ segir hann.
Honza vonast eftir að kynnast konu sem lítur ekki á „Barbie-útlit“ hans sem vandamál. „Sumum konum þykir útlit mitt vandamál eða finnst það skrýtin staðreynd að ég, sem er karlmaður, vil líta út eins og Barbie,“ segir hann og bætir við að hann reynir að láta ekki neikvæðar athugasemdir annarra trufla sig.
„Já, ég er gaurinn sem lítur út eins og Barbie. En það þýðir ekki að þú mátt vera vondur við mig.“
