Krabbameinsfelagið, færeysk samtök sem svipa mikið til íslenska Krabbameinsfélagsins, fundu upp á skemmtilegri leið til að komast undan ritskoðun samfélagsmiðla á brjóstum kvenna.
Í myndbandi sem félagið deildi í gær er fólki sýnt hvernig skuli þreifa á brjóstum til að athuga hvort þar sé krabbamein að finna. Þar sem samfélagsmiðlar á borð við Facebook og Instagram leyfa ekki myndbönd með kvenmannsbrjóstum ákvað félagið að fara sniðuga krókaleið. Það fékk konu til að sýna hvernig skuli þreifa fyrir krabbameini með sýnikennslu á karlmannsbrjóstum.
„Brjóstin á konum – sérstaklega geirvörturnar – eru oftast bannaðar á samfélagsmiðlum,“ segir félagið um myndbandið sem deilt var í gær. „Við fundum brjóst sem ekki er bannað að sýna: Karlmannsbrjóst!“
Hér fyrir neðan má sjá myndbandið sem um ræðir: