Jewells Chambers býr á Íslandi og heldur úti YouTube-rásinni All Things Iceland. Hún heldur einnig úti samnefndri Instagram-síðu og hlaðvarpi.

Hún er dugleg að deila myndböndum frá Íslandi og öllu því sem tengist. Í nýjasta myndbandinu fer hún yfir fimm hluti sem hún þolir ekki þegar kemur að því að læra íslensku. Jewells hefur áður farið yfir fimm hluti sem hún elskar við íslenskt tungumál.

Jewells er frá Bandaríkjunum og hefur búið á Íslandi í nokkur ár. Hún segir tungumálið geta verið erfitt viðureignar og það fyrsta sem hún nefnir er íslensk málfræði.

„Málfræðin getur verið rosalega erfið,“ segir hún og vísar í fallbeygingu orða og kyn orða.

„Ekki láta mig einu sinni byrja á að tala um tölustafina frá einum upp í fjóra. Það er viss áskorun að muna þetta og þetta er alveg eitthvað sem ég hef klikkað á síðustu ár.“

Númer tvö á listanum eru undantekningar í íslenskri málfræði.

Næsta sem hún nefnir er að hún á það til að efast um sig sjálfa og endar með að orða setningar eins og spurningu. Í stað þess að segja „Ég fór til Reykjavíkur“ þá segir hún „ég fór til Reykjavíkur?“ Því hún byrjar að efast um hvort hún sé að beygja orðið rétt.

Það fjórða sem hún nefnir er samhljómun. Hún tekur dæmi: „Bóndinn á Á á á á á. Það er raunveruleg setning,“ segir hún og þýðir setninguna yfir á ensku. „Það er ekki eins og fólk sé alltaf að segja svona setningar. En svona samhljómar, eins og á, geta verið mjög brögðóttir.“

Það síðasta sem hún nefnir er að Íslendingar vilja æfa ensku.

„Oft þegar Íslendingar heyra að þú sért með hreim eða segir eitthvað vitlaust þá skipta þeir yfir í ensku. Ég viðurkenni alveg að stundum hef ég verið þakklát fyrir það en stundum þegar ég er virkilega að reyna að eiga samtal á íslensku þá er það erfitt þegar manneskjan svarar á ensku. Það getur verið pirrandi, en ég læt manneskjuna vita að ég sé að æfa mig í íslensku og spyr hvort manneskjan geti talað við mig á íslensku,“ segir hún.

Horfðu á myndbandið hér að neðan.

Fyrir nokkrum vikum deildi Jewell myndbandi og fór yfir fimm hluti sem þú átt ekki að gera, annars gætirðu móðgað Íslending. Þú getur fylgst með henni á YouTube og Instagram.