Íslendingar á Twitter gera stólpagrín að einbýlishúsi á Seltjarnanesi sem var nýverið auglýst til sölu. Húsið stendur við Víkurströnd og er uppsett verð litlar 130 milljónir króna. Myndir af húsinu má sjá hér fyrir neðan.
Það er þó er ein mynd sem hefur vakið sérstaka kátínu en á henni má sjá nokkurskonar samblöndu af vínkjallara og herbergi undir heitan pott. Grafíski hönnuðurinn Bobby Breiðholt benti fyrst á þetta sérkennilega herbergi og skrifaði: „Að skoða ævintýralega dýrar eignir á Seltjarnarnesi er svo kexrugluð innsýn í 0,1 prósentið. Hérna fara t.d. þessi ananas partý fram.“
Berglind Festival Pétursdóttir bendir svo á hve heitt þetta herbergi verður líklegast. „Er eitthvað sveittara en heitipottur innandyra? Hversu heitt langar þér að vera nákvæmlega???,“ spyr Berglind og Bobby bætir við það: „Alveg fjólublár af þrúti, rauðvínsflaska fljótandi í pottinum og svo fljúga á hausinn á þessum flísatröppum.“
Hvaða FÁVITI geymir vínið sitt í sama herbergi og hann er með sturtu og heitan pott??? https://t.co/T5mH9Sm5HZ
— Steinþór Helgi (@StationHelgi) January 28, 2020
Steinþór Helgi Arnsteinsson, vert á Hverfisgötu, bendir réttilega á að líklega fari hitinn ekki vel með vínið. „Hvaða FÁVITI geymir vínið sitt í sama herbergi og hann er með sturtu og heitan pott???,“ spyr Steinþór. Því svarar Sigrún Skaftadóttir, formaður kvennahreyfingar Samfylkingarinnar: „Einhver sem veit ekkert um vín og ætti að skammast sín“