Tímaritið Myndir mánaðarins hættir útgáfu eftir 26 ára samfellda mánaðarlega útgáfu. Á þeim árum hefur blaðið verið dreift ókeypis víða um land, meðal annars í bíóhúsum, á vídeóleigum og öllum helstu sölustöðum kvikmynda. Síðasta blaðið sem gefið var út er janúarhefti þessa árs.
Útgefandi Mynda mánaðarins er Myndmark – félag myndbandaútgefanda og myndbandaleigna. Ritstjóri blaðsins er Bergur Ísleifsson og hefur hann gegnt því starfi undanfarinn áratug, en þar á undan var það Erlingur Grétar Einarsson sem sá um það hlutverk.
Fyrsta tölublaðið kom út í febrúar árið 1994 og hét þá tímaritið Myndbönd mánaðarins, enda var þá eingöngu fjallað um dreifingu VHS-spólna á Íslandi. Árið 2002 var nafninu breytt þegar DVD-diskarnir voru komnir til sögunnar og farnir að leigjast meira en VHS-spólurnar. Blaðið hefur um árabil verið prentað í rúmlega 20 þúsund eintökum.
Í blaðinu hefur verið fjallað um allt það helsta sem viðkemur kvikmyndaheiminum. Einnig er fjallað um nýjar myndir sem væntanlegar eru á markaðinn, bæði í bíó og á vídeó og er ljóst að tímaritið eigi sér dyggan sess í íslenskri kvikmyndamenningu.
Lestur á blaðinu hefur verið mældur frá árinu 1999 og er blaðið með lestur á bilinu 30 – 40% hjá allri þjóðinni en hjá unga fólkinu (12 – 29 ára) er lestur á bilinu 55 – 75%.