Kári Kristján Kristjánsson, línumaðurinn sterki í íslenska landsliðinu í handbolta, var ómyrkur í máli eftir tapið gegn Svíþjóð í lokaleik Íslands í milliriðlum Evrópumótsins í handbolta í gærkvöldi. Ísland tapaði leiknum með sjö marka mun, 32:25, og endaði í neðsta sæti í sínum riðli.
Eftir sigur á Dönum í fyrsta leik mótsins og stórsigur á Rússum voru margir bjartsýnir á gott gengi á mótinu. Íslenska liðið tapaði hins vegar mikilvægum leik gegn Ungverjalandi og fór stigalaust í milliriðla. Þar tapaði liðið gegn Slóveníu, Noregi og Svíþjóð en vann góðan sigur á Portúgal. Ísland endar líklega í 11. sæti mótsins.
Í viðtali við RÚV eftir leikinn í gær var Kári beðinn um að gera upp mótið. Hann sagði það vitanlega ógeðslega leiðinlegt að tapa handboltaleik og sagði íslenska liðið hafi bæði flogið hátt á mótinu og svo tekið þétta dýfu. Svo sneri hann sér að gagnrýninni á liðið og Aron Pálmarsson, einn allra besta handboltamann heims.
„Maður fylgist náttúrulega með umræðunni og allt það. Fólk verður að skilja það og setja þetta í samhengi að það er álag. Ég held að það sé rétt hjá mér að það eru 7 leikir á 12 dögum, þetta er bara mikið og á ákveðnum póstum hjá okkur gríðarlegt álag.“
„Mér er alveg sama hvernig þessu er tekið sem ég er að fara að segja að það sé verið að hnýta svona mikið í Aron Pálmarsson. Það er ætlast til þess að hann beri þetta uppi algjörlega á herðunum. Við erum að spila mjög háa ákefð sérstaklega varnarlega en líka sóknarlega. Þetta er bara maður skilurðu, auðvitað viljum við öll standa okkur en mér finnst full vel í lagt hvernig umræðan er um hann.“
Kári var svo beðinn um að nefna það jákvæða við mótið.
„Við erum með stráka sem eru með efnilegustu strákum Evrópu. Við þurfum að drullast til að vera jákvæð í þessu líka. Við erum með Hauk Þrastarson og Viktor [Gísla Hallgrímsson] og þetta eru gríðarlega efnilegir strákar og svo eru aðrir sem eru að fá eldskírn á þessu móti sem eru að stíga upp og eru að skila fínum mínútum. Við verðum að rækta það. Þetta má ekki að verða þannig að þessir drengir upplifi þetta mót eins og þetta hafi verið eintóm niðursveifla. Við verðum að horfa aðeins fram á veginn.“
Björgvin Páll Gústavsson landsliðsmarkvörður tjáði sig einnig stuttlega um mótið á Twitter og þakkaði stuðninginn.
„Langar að þakka öllum þeim sem trúðu, öllum þeim sem mættu í stúkuna, öllum þeim sem sendu okkur pepp og stuðning í formi skilaboða og öllum sem öskruðu á sjónvarpið! Við erum að þessu fyrir ykkur! Við erum ekki að þessu fyrir ykkur hin. “If you can’t handle me at my worst, then you don’t deserve me at my best!” Áfram Ísland! Fyrir Ísland!“