Þórunn Ólafsdóttir, sem er helst þekkt fyrir störf á sviði mannúðar- og sjálfboðastarfa, deildi afar gleðilegri sögu á Twitter-síðu sinni í gær. Óhætt er að segja að sagan hafi vakið mikla og jákvæða athygli.
„Af því janúar er búinn að vera hræðilegur langar mig að segja ykkur smá fallegt. Í dag rakst ég óvænt á ung hjón sem ég kynntist í vinnunni fyrir nokkrum árum,“ segir Þórunn í byrjun færslunnar.
Hún segir að þegar hún hitti þau á sínum tíma hafi þau verið búin að vera á flótta í mörg ár og gjörsamlega uppgefin á líkama og sál.
„Þau áttu lítið barn, hrikalega sögu og óvissan um framtíðina var óbærileg. Svo komu óvænt gleðitíðindi – þau fengu vernd. Fólkið sem ég rakst á núna 2 árum síðar var svo gjörbreytt. Svo uppfullt af lífsorku og svo kynntu þau mig stolt fyrir nýjum fjölskyldumeðlim.“
Þórunn segir að allt samtalið hafi farið fram á íslensku og ungu hjónin sagt henni óðamála og stolt frá því sem á daga þeirra hefur drifið.
„Get ekki hætt að sjá glöðu andlitin þeirra fyrir mér. Þau eru örugg. Búin að koma sér vel fyrir og ég samgleðst þeim svo innilega. Þau fengu tækifærið sem fólk á skilið.“
Fjölmargir hafa sett hjarta við færslu Þórunnar og þakkað henni fyrir þessa fallegu og jákvæðu sögu í skammdeginu.