Spákonan Sigríður Klingenberg, betur þekkt sem Sigga Kling, gekkst undir aðgerð á dögunum eftir að sortuæxli fannst á fætinum á henni. Sigríður gekkst undir aðgerð fyrir áramót og dvaldi á Landspítalanum yfir áramótin þar sem hún var skorin upp.
Í samtali við Smartlandið á mbl.is segir Sigríður að hún hafi verið með svartan blett á fætinum sem hún hafi í raun lítið spáð í. Það var ekki fyrr en hún frétt að Marta Jónsson skóhönnuður hefði verið með svipaðan blett að hún fór að veita honum meiri athygli.
Hún fór því til læknis þar sem krabbamein greindist í blettinum. Sigríður segist hafa dvalið í níu daga á spítalanum eftir aðgerðina og sú upplifun hafi opnað augu hennar.
„Ég er mjög þakklát eftir þessa spítalavist því þú veist hvað þú mátt þakka fyrir þegar þú ert komin á þennan stað,“ segir hún og bætir við að hún sé fyrst núna að geta stigið í fótinn eftir aðgerðina.
„Það að vera þarna í níu daga breytti lífi mínu. Það var rosalega vel hugsað um mig þarna. Það er ekkert sem ég get gagnrýnt eftir að hafa legið þarna á Landspítalanum,“ segir hún í viðtalinu.