CrossFit-stjarnan Annie Mist Þórisdóttir eignaðist dóttur á mánudaginn síðastliðinn. Þetta er fyrsta barn hennar og unnusta hennar, Frederik Aeigidius.
Annie Mist greindi frá gleðifregnunum á Instagram fyrr í vikunni. Í nýrri færslu opnar hún sig um fæðinguna, sem hún segir hafi gengið mjög illa og á hún framundan langa og stranga leið til bata.
Annie Mist segist hafa reiknað með því að fæðingin myndi ganga vel, en því miður varð raunin ekki sú.
„Ég ætla ekki að fara út í smáatriði en þetta er það erfiðasta sem ég hef nokkurn tíma gert,“ segir Annie Mist.
Fyrstu verkir byrjuðu laugardagsmorguninn 8. ágúst og kom stúlkan í heiminn rúmlega tveimur dögum síðar, mánudaginn 10. ágúst.
„Ég veit ekki eftir hversu marga tíma í hríðum, þá kom hún loksins í heiminn. Það heyrðist ekkert í henni og þetta voru lengstu mínútur lífs míns. Svo heyrðum við loksins háan grátur og hún er hundrað prósent heilbrigð,“ segir Annie Mist.
CrossFit-stjarnan segist vera þakklát fyrir ljósmæðurnar og læknana á spítalanum.
„Ég endaði með því að missa rúmlega tvo lítra af blóði og á framundan langan og strangan veg til bata. Ég er kannski ekki ég sjálf í dag og þetta tekur kannski smá tíma. Ég á eftir að þurfa aðstoð við einföld verk en mér mun batna. Ég er með Frederik og litlu stelpuna mína mér við hlið,“ segir hún.
Þú getur lesið frásögn Annie Mistar í heild sinni hér að neðan.
https://www.instagram.com/p/CD7Q76GHXnH/
