Sigríður Júnía Ástráðsdóttir og eiginmaður hennar, Björn Björnsson, tóku fellihýsið í gegn. Það er ótrúlegur munur á fellihýsinu eins og sést á meðfylgjandi myndum.
„Þetta er þvílík breyting, alveg dásamlegt,“ segir Sigríður í samtali við DV.
Sigríður deildi „fyrir og eftir“ myndum í Facebook-hópinn Skreytum hús í gær og viðbrögðin leyndu sér ekki. Yfir 1200 manns hafa líkað við færsluna og segir Sigríður athyglina hafa komið sér á óvart. Það sem vakti hvað mesta athygli var að hjónin tóku allar gardínur úr gluggum og settu rúllugardínur í staðinn.
„Greinilega einhver nýbreytni sem fólk tók eftir,“ segir Sigríður.
Sigríður segir að þau hafi ekki verið stanslaust í framkvæmdum en þetta hafi tekið um tvo mánuði með hléum.
„Kostnaðurinn liggur í parketinu, málningu og lakki. En svo unnum við þetta allt sjálf. Við tókum allar innréttingar í burtu. Rifum dúkinn af gólfinu og settum plastparket með korki að neðan í staðinn. Við grunnuðum svo innréttingarnar bæði að innan og utan og svo er allt málað og lakk yfir allt. Við grunnuðum allt, meðal annars svefnrýmin, og lokuðum þannig á allan við. Stangirnar inn í svefnrýmunum eru spreyjaðar svartar, en allt járn var spreyjað með möttum svörtum lit,“ segir Sigríður.