Áskorun eru nýir þættir á Sjónvarpi Símans. Í þáttunum er rætt við afreksfólk í íþróttum sem hefur með einstöku hugarfari og þrautseigju sigrast á ólíkum áskorunum í gegnum lífið, innan vallar og utan.

Áhorfendur kynnast viðmælendum í sínu náttúrulega umhverfi og fá að sjá hliðar sem fáir ef nokkrir þekkja, að baki sögum sem flestir hafa heyrt; kynnast manneskjunni undir búningnum. Rætt er við samstarfsfólk, fjölskyldu og vini og kafað undir yfirborðið í sögu hvers og eins.

Í næsta þætti verður rætt við Ólympíufarann og Akranesinginn Inga Þór Jónsson.

„Það má segja að ég hafi komið út úr skápnum sem hommi og inn í skápinn sem íþróttamaður,“ segir Ingi Þór í stiklu fyrir þáttinn.

„Það voru gífurlegir fordómar í íþróttum gagnvart samkynhneigðum á þessum tíma. Það var ekki pláss fyrir mig í þeim heimi.“

Horfðu á stikluna hér að neðan. Þátturinn verður sýndur fimmtudaginn 23. apríl  í línulegri dagskrá klukkan 20:10.