„Nú þykir mér týra!,“ segir Illugi í byrjun færslunnar. „Ég fékk sent í pósti umslag með tölvukubb inní og engu öðru. Engar vísbendingar um sendanda. Ég var hálf tortrygginn þegar ég setti kubbinn í tölvuna en þegar ég sá hvað þetta var datt af mér andlitið.“
Umslagið innihélt 95 þæti af útvarpsþættinum Frjálsum höndum sem Illugi sér um en þættirnir í umslaginu eru frá árunum 1988-2003. „Ég á ekkert af þessu sjálfur og veit að Ríkisútvarpið geymdi aðeins fáa þætti. Þetta eru því ómetanlegar heimildir, að minnsta kosti fyrir mig,“ segir Illugi.
„Ég er afar þakklátur og snortinn yfir þessari sendingu, og ef viðkomandi er á Facebook, þá má hann eða hún vita að þetta gleður mig mikið. Kannski ég laumi einum og einum þætti á Facebook ef þeir hafa elst sæmilega!,“ segir Illugi í lok færslunnar og þakkar fyrir sig.
Um þættina Frjálsar hendur segir á RÚV að Illugi spjalli þar um hvaðeina milli himins og jarðar, oft af sögulegu tagi. Þá les hann forvitnilega texta úr ýmsum áttum, bæði íslenska og erlenda, og reynir af öllum mætti að hafa ofan af fyrir hlustendum þá klukkustund sem þátturinn stendur.
