Valdís Óskarsdóttir hefur verið ráðin til að klippa nýjustu kvikmyndina í leikstjórn Seans Penn. Um er að ræða sannsögulegt drama sem segir frá konu sem reynir að henda reiður á skuggalegu glæpalífi föður síns. Myndin ber heitið Flag Day og er byggð á bókinni Flim-Flam Man eftir Jennifer Vogel.

Tökur á myndinni hófust í júlí og má búast við frumsýningu á næsta ári. Flag Day skartar leikurunum Josh Brolin, Miles Teller, Eddie Marsan, Dale Dickey, Penn sjálfum og Katherine Winnick, sem margir þekkja úr þáttunum Bones og Vikings. Einnig fara börn leikstjórans, Dylan og Hopper Penn, með hlutverk í myndinni.

Valdís hefur komið víða við á glæstum ferli, en hún er þekktust fyrir að hafa klippt kvikmyndirnar Festen, Sveitabrúðkaup (sem hún leikstýrði einnig) og Eternal Sunshine of the Spotless Mind, en fyrir þá mynd hlaut hún BAFTA-verðlaunin árið 2005. Einnig sá hún um að klippa leikstjórnarfrumraun leikarans Ryans Gosling, Lost Rive, en seinast vann hún Edduverðlaunin fyrir klippingu á þáttunum Fangar.

Þess má einnig geta að Valdís er fulltrúi Wom@rts á Íslandi í samstarfi við Samtök kvenna í kvikmyndum og sjónvarpi á Norðurlöndunum (WIFT Nordic).