Aníta Briem leikkona var gestur Fannars Sveinssonar í þættinum Framkoma. Hún opnaði sig um erfiðleika í æsku og sagði frá tíma sínum inni á Barna- og unglingageðdeild.
„Þegar ég var bara 15-16 þá fann ég alveg rosalega mikla innilokunarkennd. Mér fannst rosalega erfitt að vera í svona litlu samfélagi. Mér fannst erfitt að fólk væri að slúðra og tala um annað fólk. Þegar fólk er búið að gera sér hugmynd af hver þú ert þá ertu fastur í því, því landið er lítið,“ sagði Aníta Briem og hélt áfram.
„Ég fékk svolítið slæma anórexíu og sat inni á Barna- og unglingageðdeild,“ sagði hún.
Þegar hún varð 16 ára gat hún útskrifað sig sjálfa af geðdeild, sem hún gerði.
„Þá tók ég ákvörðun um að útskrifa mig af geðdeild og flytja til London. Ég gerði það og það var bara ótrúlega gott fyrir mig af því að ég náði alveg að hífa mig upp úr veikindunum, breyta um umhverfi og fá að uppgötva aðrar hliðar á mér,“ sagði Aníta.
Aníta Briem hefur búið síðastliðinn áratug í Los Angeles og leikið í hinum ýmsu þáttum og kvikmyndum. Hún kom nýverið til Íslands til að leika aðalhlutverkið í sjónvarpsseríunni Ráðherrann, á móti Ólafi Darra Ólafssyni.