Baráttukonan unga, Steinunn Radha, er hugsi og full söknuðar þessa dagana vegna átaksins Á allra vörum – vitundarvakningu um böl fíkniefnaneyslu. Steinunn hefur aldrei verið í neyslu sjálf en hefur samt orðið fyrir miklum afleiðingum af völdum fíkniefna því góðir vinir hennar hafa glatað gæfu og lífi í fen fíkniefnanna. Fyrir um ári síðan hnoðaði hún lífi í vin sinn sem var hætt komin vegna neyslu og sjúkralið kom síðan á vettvang og dælt var upp úr honum. Vinurinn hafði tekið inn oxycontin. „Hann er því miður enn fastur í neyslu,“ segir Steinunn, aðspurð um afdrif vinar hennar.

Á síðustu tveimur árum hefur misnotkun á læknadópi meðal ungmenna farið ört vaxandi og hefur Steinunn orðið mjög vör við það í vinahópnum. Hins vegar telur hún að kókaínneysla sé stærra vandamál. Kókaín er almennt talið vera mjög dýrt fíkniefni og því vaknar spurning um hvernig ungt fólk fjármagnar slíka neyslu. „Þegar þú ert djúpt sokkinn í neyslu þá gerirðu allt til að ná í þetta, lendir í skuldum og rænir jafnvel,“ segir Steinunn.

„Það er mikll söknuður í hjarta mínu núna,“ segir Steinunn en hún óskar þess að átakið Á allra vörum verði til þess að fólk verði meira vakandi fyrir misnotkun lyfja og fíkniefnaneyslu sem og að þeir sem búa yfir erfiðri reynslu stígi fram og segir frá henni, og að þeir verði teknir alvarlega.

Steinunn skrifaði stuttan og áhrifamikinn pistil á Facebook í tilefni átaksins og er hann eftirfarandi:

Í gærmorgun vaknaði ég við syngjandi kirkjuklukkur Bústaðakirkju og hélt að það væri sunnudagur. Ég leit á dagatalið og sá að svó var ekki. Kirkjuklukkur ómuðu um 8 leytið í tilefni átaksins „VAKNAÐU/á allra vörum“ og því er ekki nema við hæfi að hafa vaknað við klukkurnar. Átakið er hugsað sem forvarnir gegn fíkniefnaneyslu.

Fíkniefni eru ekkert til að grínast með eða gera lítið úr alvarleika þeirra. Tilvist þeirra hefur áhrif á flesta, beint eða óbeint.

Ég hef orðið fyrir áhrifum þeirra. Ég þekki fólk, fólk sem er mér kært sem ég hef misst inn í heim myrkurs og fíknar. Afleiðingin fyrir mig voru geðshræringar og andvökunætur. Í kjölfarið bitnuðu þessar afleiðingar á góðum vinum mínum og höfðu áhrif á þá í gegn um mig. Þeir sáu mig í andlegu ástandi sem þeir höfðu ekkert að gera með að sjá mig í eða voru nálægt því að blandast inn í mínar aðstæður, geðshræringar og urðu þannig hluti þess sem eiturlyf ala af sér. Mér þykir það leitt en sá á sama tíma að ég á dýrmæta vini.